Bhagavad Gita Chapters 11-15

arjuna uvāca.

madanugrahāya paramaṃ guhyamadhyātmasaṃjñitam.

yattvayoktaṃ vacastena moho.ayaṃ vigato mama

bhavāpyayau hi bhūtānāṃ śrutau vistaraśo mayā.

tvattaḥ kamalapatrākṣa māhātmyamapi cāvyayam

evametadyathāttha tvamātmānaṃ parameśvara.

draṣṭumicchāmi te rūpamaiśvaraṃ puruṣottama

manyase yadi tacchakyaṃ mayā draṣṭumiti prabho.

yogeśvara tato me tvaṃ darśayātmānamavyayam

śrībhagavānuvāca.

paśya me pārtha rūpāṇi śataśo.atha sahasraśaḥ.

nānāvidhāni divyāni nānāvarṇākṛtīni ca

paśyādityānvasūnrudrānaśvinau marutastathā.

bahūnyadṛṣṭapūrvāṇi paśyāścaryāṇi bhārata

ihaikasthaṃ jagatkṛtsnaṃ paśyādya sacarācaram.

mama dehe guḍākeśa yaccānyad draṣṭumicchasi

na tu māṃ śakyase draṣṭumanenaiva svacakṣuṣā.

divyaṃ dadāmi te cakṣuḥ paśya me yogamaiśvaram

sañjaya uvāca.

evamuktvā tato rājanmahāyogeśvaro hariḥ.

darśayāmāsa pārthāya paramaṃ rūpamaiśvaram

anekavaktranayanamanekādbhutadarśanam.

anekadivyābharaṇaṃ divyānekodyatāyudham

divyamālyāmbaradharaṃ divyagandhānulepanam.

sarvāścaryamayaṃ devamanantaṃ viśvatomukham

divi sūryasahasrasya bhavedyugapadutthitā.

yadi bhāḥ sadṛśī sā syādbhāsastasya mahātmanaḥ

tatraikasthaṃ jagatkṛtsnaṃ pravibhaktamanekadhā.

apaśyaddevadevasya śarīre pāṇḍavastadā

tataḥ sa vismayāviṣṭo hṛṣṭaromā dhanañjayaḥ.

praṇamya śirasā devaṃ kṛtāñjalirabhāṣata

arjuna uvāca.

paśyāmi devāṃstava deva dehe sarvāṃstathā bhūtaviśeṣasaṅghān.

brahmāṇamīśaṃ kamalāsanasthaṃ ṛṣīṃśca sarvānuragāṃśca divyān

anekabāhūdaravaktranetraṃ paśyāmi tvāṃ sarvato.anantarūpam.

nāntaṃ na madhyaṃ na punastavādiṃ paśyāmi viśveśvara viśvarūpa

kirīṭinaṃ gadinaṃ cakriṇaṃ ca tejorāśiṃ sarvato dīptimantam.

paśyāmi tvāṃ durnirīkṣyaṃ samantād dīptānalārkadyutimaprameyam

tvamakṣaraṃ paramaṃ veditavyaṃ tvamasya viśvasya paraṃ nidhānam.

tvamavyayaḥ śāśvatadharmagoptā sanātanastvaṃ puruṣo mato me

anādimadhyāntamanantavīryam anantabāhuṃ śaśisūryanetram.

paśyāmi tvāṃ dīptahutāśavaktraṃ svatejasā viśvamidaṃ tapantam

dyāvāpṛthivyoridamantaraṃ hi vyāptaṃ tvayaikena diśaśca sarvāḥ.

dṛṣṭvādbhutaṃ rūpamugraṃ tavedaṃ lokatrayaṃ pravyathitaṃ mahātman

amī hi tvāṃ surasaṅghā viśanti kecidbhītāḥ prāñjalayo gṛṇanti.

svastītyuktvā maharṣisiddhasaṅghāḥ stuvanti tvāṃ stutibhiḥ puṣkalābhiḥ

rudrādityā vasavo ye ca sādhyā viśve.aśvinau marutaścoṣmapāśca.

gandharvayakṣāsurasiddhasaṅghā vīkṣante tvāṃ vismitāścaiva sarve

rūpaṃ mahatte bahuvaktranetraṃ mahābāho bahubāhūrupādam.

bahūdaraṃ bahudaṃṣṭrākarālaṃ dṛṣṭvā lokāḥ pravyathitāstathāham

nabhaḥspṛśaṃ dīptamanekavarṇaṃ vyāttānanaṃ dīptaviśālanetram.

dṛṣṭvā hi tvāṃ pravyathitāntarātmā dhṛtiṃ na vindāmi śamaṃ ca viṣṇo

daṃṣṭrākarālāni ca te mukhāni dṛṣṭvaiva kālānalasannibhāni.

diśo na jāne na labhe ca śarma prasīda deveśa jagannivāsa

amī ca tvāṃ dhṛtarāṣṭrasya putrāḥ sarve sahaivāvanipālasaṅghaiḥ.

bhīṣmo droṇaḥ sūtaputrastathāsau sahāsmadīyairapi yodhamukhyaiḥ

vaktrāṇi te tvaramāṇā viśanti daṃṣṭrākarālāni bhayānakāni.

kecidvilagnā daśanāntareṣu sandṛśyante cūrṇitairuttamāṅgaiḥ

yathā nadīnāṃ bahavo.ambuvegāḥ samudramevābhimukhā dravanti.

tathā tavāmī naralokavīrā viśanti vaktrāṇyabhivijvalanti

yathā pradīptaṃ jvalanaṃ pataṅgā viśanti nāśāya samṛddhavegāḥ.

tathaiva nāśāya viśanti lokāsa- tavāpi vaktrāṇi samṛddhavegāḥ

lelihyase grasamānaḥ samantāl- lokānsamagrānvadanairjvaladbhiḥ.

tejobhirāpūrya jagatsamagraṃ bhāsastavogrāḥ pratapanti viṣṇo

ākhyāhi me ko bhavānugrarūpo namo.astu te devavara prasīda.

vijñātumicchāmi bhavantamādyaṃ na hi prajānāmi tava pravṛttim

śrībhagavānuvāca.

kālo.asmi lokakṣayakṛtpravṛddho lokānsamāhartumiha pravṛttaḥ.

ṛte.api tvāṃ na bhaviṣyanti sarve ye.avasthitāḥ pratyanīkeṣu yodhāḥ

tasmāttvamuttiṣṭha yaśo labhasva jitvā śatrūn bhuṅkṣva rājyaṃ samṛddham.

mayaivaite nihatāḥ pūrvameva nimittamātraṃ bhava savyasācin

droṇaṃ ca bhīṣmaṃ ca jayadrathaṃ ca karṇaṃ tathānyānapi yodhavīrān.

mayā hatāṃstvaṃ jahi mavyathiṣṭhā yudhyasva jetāsi raṇe sapatnān

sañjaya uvāca.

etacchrutvā vacanaṃ keśavasya kṛtāñjalirvepamānaḥ kirīṭī.

namaskṛtvā bhūya evāha kṛṣṇaṃ sagadgadaṃ bhītabhītaḥ praṇamya

arjuna uvāca.

sthāne hṛṣīkeśa tava prakīrtyā jagatprahṛṣyatyanurajyate ca.

rakṣāṃsi bhītāni diśo dravanti sarve namasyanti ca siddhasaṅghāḥ

kasmācca te na nameranmahātman garīyase brahmaṇo.apyādikartre.

ananta deveśa jagannivāsa tvamakṣaraṃ sadasattatparaṃ yat

tvamādidevaḥ puruṣaḥ purāṇasa- tvamasya viśvasya paraṃ nidhānam.

vettāsi vedyaṃ ca paraṃ ca dhāma tvayā tataṃ viśvamanantarūpa

vāyuryamo.agnirvaruṇaḥ śaśāṅkaḥ prajāpatistvaṃ prapitāmahaśca.

namo namaste.astu sahasrakṛtvaḥ punaśca bhūyo.api namo namaste

namaḥ purastādatha pṛṣṭhataste namo.astu te sarvata eva sarva.

anantavīryāmitavikramastvaṃ sarvaṃ samāpnoṣi tato.asi sarvaḥ

sakheti matvā prasabhaṃ yaduktaṃ he kṛṣṇa he yādava he sakheti.

ajānatā mahimānaṃ tavedaṃ mayā pramādātpraṇayena vāpi

yaccāvahāsārthamasatkṛto.asi vihāraśayyāsanabhojaneṣu.

eko.athavāpyacyuta tatsamakṣaṃ tatkṣāmaye tvāmahamaprameyam

pitāsi lokasya carācarasya tvamasya pūjyaśca gururgarīyān.

na tvatsamo.astyabhyadhikaḥ kuto.anyo lokatraye.apyapratimaprabhāva

tasmātpraṇamya praṇidhāya kāyaṃ prasādaye tvāmahamīśamīḍyam.

piteva putrasya sakheva sakhyuḥ priyaḥ priyāyārhasi deva soḍhum

adṛṣṭapūrvaṃ hṛṣito.asmi dṛṣṭvā bhayena ca pravyathitaṃ mano me.

tadeva me darśaya deva rūpaṃ prasīda deveśa jagannivāsa

kirīṭinaṃ gadinaṃ cakrahastaṃ icchāmi tvāṃ draṣṭumahaṃ tathaiva.

tenaiva rūpeṇa caturbhujena sahasrabāho bhava viśvamūrte

śrībhagavānuvāca.

mayā prasannena tavārjunedaṃ rūpaṃ paraṃ darśitamātmayogāt.

tejomayaṃ viśvamanantamādyaṃ yanme tvadanyena na dṛṣṭapūrvam

na vedayajñādhyayanairna dānaira- na ca kriyābhirna tapobhirugraiḥ.

evaṃrūpaḥ śakya ahaṃ nṛloke draṣṭuṃ tvadanyena kurupravīra

mā te vyathā mā ca vimūḍhabhāvo dṛṣṭvā rūpaṃ ghoramīdṛṅmamedam.

vyapetabhīḥ prītamanāḥ punastvaṃ tadeva me rūpamidaṃ prapaśya

sañjaya uvāca.

ityarjunaṃ vāsudevastathoktvā svakaṃ rūpaṃ darśayāmāsa bhūyaḥ.

āśvāsayāmāsa ca bhītamenaṃ bhūtvā punaḥ saumyavapurmahātmā

arjuna uvāca.

dṛṣṭvedaṃ mānuṣaṃ rūpaṃ tava saumyaṃ janārdana.

idānīmasmi saṃvṛttaḥ sacetāḥ prakṛtiṃ gataḥ

śrībhagavānuvāca.

sudurdarśamidaṃ rūpaṃ dṛṣṭavānasi yanmama.

devā apyasya rūpasya nityaṃ darśanakāṅkṣiṇaḥ

nāhaṃ vedairna tapasā na dānena na cejyayā.

śakya evaṃvidho draṣṭuṃ dṛṣṭavānasi māṃ yathā

bhaktyā tvananyayā śakya ahamevaṃvidho.arjuna.

jñātuṃ draṣṭuṃ ca tattvena praveṣṭuṃ ca parantapa

matkarmakṛnmatparamo madbhaktaḥ saṅgavarjitaḥ.

nirvairaḥ sarvabhūteṣu yaḥ sa māmeti pāṇḍava

arjuna uvāca.

evaṃ satatayuktā ye bhaktāstvāṃ paryupāsate.

ye cāpyakṣaramavyaktaṃ teṣāṃ ke yogavittamāḥ

śrībhagavānuvāca.

mayyāveśya mano ye māṃ nityayuktā upāsate.

śraddhayā parayopetāḥ te me yuktatamā matāḥ

ye tvakṣaramanirdeśyamavyaktaṃ paryupāsate.

sarvatragamacintyañca kūṭasthamacalandhruvam

sanniyamyendriyagrāmaṃ sarvatra samabuddhayaḥ.

te prāpnuvanti māmeva sarvabhūtahite ratāḥ

kleśo.adhikatarasteṣāmavyaktāsaktacetasām ||

avyaktā hi gatirduḥkhaṃ dehavadbhiravāpyate

ye tu sarvāṇi karmāṇi mayi saṃnyasya matparaḥ.

ananyenaiva yogena māṃ dhyāyanta upāsate

teṣāmahaṃ samuddhartā mṛtyusaṃsārasāgarāt.

bhavāmi nacirātpārtha mayyāveśitacetasām

mayyeva mana ādhatsva mayi buddhiṃ niveśaya.

nivasiṣyasi mayyeva ata ūrdhvaṃ na saṃśayaḥ

atha cittaṃ samādhātuṃ na śaknoṣi mayi sthiram.

abhyāsayogena tato māmicchāptuṃ dhanañjaya

abhyāse.apyasamartho.asi matkarmaparamo bhava.

madarthamapi karmāṇi kurvansiddhimavāpsyasi

athaitadapyaśakto.asi kartuṃ madyogamāśritaḥ.

sarvakarmaphalatyāgaṃ tataḥ kuru yatātmavān

śreyo hi jñānamabhyāsājjñānāddhyānaṃ viśiṣyate.

dhyānātkarmaphalatyāgastyāgācchāntiranantaram

adveṣṭā sarvabhūtānāṃ maitraḥ karuṇa eva ca.

nirmamo nirahaṅkāraḥ samaduḥkhasukhaḥ kṣamī

santuṣṭaḥ satataṃ yogī yatātmā dṛḍhaniścayaḥ.

mayyarpitamanobuddhiryo madbhaktaḥ sa me priyaḥ

yasmānnodvijate loko lokānnodvijate ca yaḥ.

harṣāmarṣabhayodvegairmukto yaḥ sa ca me priyaḥ

anapekṣaḥ śucirdakṣa udāsīno gatavyathaḥ.

sarvārambhaparityāgī yo madbhaktaḥ sa me priyaḥ

yo na hṛṣyati na dveṣṭi na śocati na kāṅkṣati.

śubhāśubhaparityāgī bhaktimānyaḥ sa me priyaḥ

samaḥ śatrau ca mitre ca tathā mānāpamānayoḥ.

śītoṣṇasukhaduḥkheṣu samaḥ saṅgavivarjitaḥ

tulyanindāstutirmaunī santuṣṭo yena kenacit.

aniketaḥ sthiramatirbhaktimānme priyo naraḥ

ye tu dharmyāmṛtamidaṃ yathoktaṃ paryupāsate.

śraddadhānā matparamā bhaktāste.atīva me priyāḥ

arjuna uvāca.

prakṛtiṃ puruṣaṃ caiva kṣetraṃ kṣetrajñameva ca.

etadveditumicchāmi jñānaṃ jñeyaṃ ca keśava

śrībhagavānuvāca.

idaṃ śarīraṃ kaunteya kṣetramityabhidhīyate.

etadyo vetti taṃ prāhuḥ kṣetrajña iti tadvidaḥ

kṣetrajñaṃ cāpi māṃ viddhi sarvakṣetreṣu bhārata.

kṣetrakṣetrajñayorjñānaṃ yattajjñānaṃ mataṃ mama

tatkṣetraṃ yacca yādṛkca yadvikāri yataśca yat.

sa ca yo yatprabhāvaśca tatsamāsena me śṛṇu

ṛṣibhirbahudhā gītaṃ chandobhirvividhaiḥ pṛthak.

brahmasūtrapadaiścaiva hetumadbhirviniścitaiḥ

mahābhūtānyahaṃkāro buddhiravyaktameva ca.

indriyāṇi daśaikaṃ ca pañca cendriyagocarāḥ

icchā dveṣaḥ sukhaṃ duḥkhaṃ saṃghātaścetanā dhṛtiḥ.

etatkṣetraṃ samāsena savikāramudāhṛtam

amānitvamadambhitvamahiṃsā kṣāntirārjavam.

ācāryopāsanaṃ śaucaṃ sthairyamātmavinigrahaḥ

indriyārtheṣu vairāgyamanahaṃkāra eva ca.

janmamṛtyujarāvyādhiduḥkhadoṣānudarśanam

asaktiranabhiṣvaṅgaḥ putradāragṛhādiṣu.

nityaṃ ca samacittatvamiṣṭāniṣṭopapattiṣu

mayi cānanyayogena bhaktiravyabhicāriṇī.

viviktadeśasevitvamaratirjanasaṃsadi

adhyātmajñānanityatvaṃ tattvajñānārthadarśanam.

etajjñānamiti proktamajñānaṃ yadato.anyathā

jñeyaṃ yattatpravakṣyāmi yajjñātvāmṛtamaśnute.

anādi matparaṃ brahma na sattannāsaducyate

sarvataḥ pāṇipādaṃ tatsarvato.akṣiśiromukham.

sarvataḥ śrutimalloke sarvamāvṛtya tiṣṭhati

sarvendriyaguṇābhāsaṃ sarvendriyavivarjitam.

asaktaṃ sarvabhṛccaiva nirguṇaṃ guṇabhoktṛ ca

bahirantaśca bhūtānāmacaraṃ carameva ca.

sūkṣmatvāttadavijñeyaṃ dūrasthaṃ cāntike ca tat

avibhaktaṃ ca bhūteṣu vibhaktamiva ca sthitam.

bhūtabhartṛ ca tajjñeyaṃ grasiṣṇu prabhaviṣṇu ca

jyotiṣāmapi tajjyotistamasaḥ paramucyate.

jñānaṃ jñeyaṃ jñānagamyaṃ hṛdi sarvasya viṣṭhitam

iti kṣetraṃ tathā jñānaṃ jñeyaṃ coktaṃ samāsataḥ.

madbhakta etadvijñāya madbhāvāyopapadyate

prakṛtiṃ puruṣaṃ caiva viddhyanādi ubhāvapi.

vikārāṃśca guṇāṃścaiva viddhi prakṛtisambhavān

kāryakāraṇakartṛtve hetuḥ prakṛtirucyate.

puruṣaḥ sukhaduḥkhānāṃ bhoktṛtve heturucyate

puruṣaḥ prakṛtistho hi bhuṅkte prakṛtijānguṇān.

kāraṇaṃ guṇasaṅgo.asya sadasadyonijanmasu

upadraṣṭānumantā ca bhartā bhoktā maheśvaraḥ.

paramātmeti cāpyukto dehe.asminpuruṣaḥ paraḥ

ya evaṃ vetti puruṣaṃ prakṛtiṃ ca guṇaiḥ saha.

sarvathā vartamāno.api na sa bhūyo.abhijāyate

dhyānenātmani paśyanti kecidātmānamātmanā.

anye sāṅkhyena yogena karmayogena cāpare

anye tvevamajānantaḥ śrutvānyebhya upāsate.

te.api cātitarantyeva mṛtyuṃ śrutiparāyaṇāḥ

yāvatsañjāyate kiñcitsattvaṃ sthāvarajaṅgamam.

kṣetrakṣetrajñasaṃyogāttadviddhi bharatarṣabha

samaṃ sarveṣu bhūteṣu tiṣṭhantaṃ parameśvaram.

vinaśyatsvavinaśyantaṃ yaḥ paśyati sa paśyati

samaṃ paśyanhi sarvatra samavasthitamīśvaram.

na hinastyātmanātmānaṃ tato yāti parāṃ gatim

prakṛtyaiva ca karmāṇi kriyamāṇāni sarvaśaḥ.

yaḥ paśyati tathātmānamakartāraṃ sa paśyati

yadā bhūtapṛthagbhāvamekasthamanupaśyati.

tata eva ca vistāraṃ brahma sampadyate tadā

anāditvānnirguṇatvātparamātmāyamavyayaḥ.

śarīrastho.api kaunteya na karoti na lipyate

yathā sarvagataṃ saukṣmyādākāśaṃ nopalipyate.

sarvatrāvasthito dehe tathātmā nopalipyate

yathā prakāśayatyekaḥ kṛtsnaṃ lokamimaṃ raviḥ.

kṣetraṃ kṣetrī tathā kṛtsnaṃ prakāśayati bhārata

śrībhagavānuvāca.

paraṃ bhūyaḥ pravakṣyāmi jñānānāṃ jñānamuttamam.

yajjñātvā munayaḥ sarve parāṃ siddhimito gatāḥ

idaṃ jñānamupāśritya mama sādharmyamāgatāḥ.

sarge.api nopajāyante pralaye na vyathanti ca

mama yonirmahad brahma tasmingarbhaṃ dadhāmyaham.

sambhavaḥ sarvabhūtānāṃ tato bhavati bhārata

sarvayoniṣu kaunteya mūrtayaḥ sambhavanti yāḥ.

tāsāṃ brahma mahadyonirahaṃ bījapradaḥ pitā

sattvaṃ rajastama iti guṇāḥ prakṛtisambhavāḥ.

nibadhnanti mahābāho dehe dehinamavyayam

tatra sattvaṃ nirmalatvātprakāśakamanāmayam.

sukhasaṅgena badhnāti jñānasaṅgena cānagha

rajo rāgātmakaṃ viddhi tṛṣṇāsaṅgasamudbhavam.

tannibadhnāti kaunteya karmasaṅgena dehinam

tamastvajñānajaṃ viddhi mohanaṃ sarvadehinām.

pramādālasyanidrābhistannibadhnāti bhārata

sattvaṃ sukhe sañjayati rajaḥ karmaṇi bhārata.

jñānamāvṛtya tu tamaḥ pramāde sañjayatyuta

rajastamaścābhibhūya sattvaṃ bhavati bhārata.

rajaḥ sattvaṃ tamaścaiva tamaḥ sattvaṃ rajastathā

sarvadvāreṣu dehe.asminprakāśa upajāyate.

jñānaṃ yadā tadā vidyādvivṛddhaṃ sattvamityuta

lobhaḥ pravṛttirārambhaḥ karmaṇāmaśamaḥ spṛhā.

rajasyetāni jāyante vivṛddhe bharatarṣabha

aprakāśo.apravṛttiśca pramādo moha eva ca.

tamasyetāni jāyante vivṛddhe kurunandana

yadā sattve pravṛddhe tu pralayaṃ yāti dehabhṛt.

tadottamavidāṃ lokānamalānpratipadyate

rajasi pralayaṃ gatvā karmasaṅgiṣu jāyate.

tathā pralīnastamasi mūḍhayoniṣu jāyate

karmaṇaḥ sukṛtasyāhuḥ sāttvikaṃ nirmalaṃ phalam.

rajasastu phalaṃ duḥkhamajñānaṃ tamasaḥ phalam

sattvātsañjāyate jñānaṃ rajaso lobha eva ca.

pramādamohau tamaso bhavato.ajñānameva ca

ūrdhvaṃ gacchanti sattvasthā madhye tiṣṭhanti rājasāḥ.

jaghanyaguṇavṛttisthā adho gacchanti tāmasāḥ

nānyaṃ guṇebhyaḥ kartāraṃ yadā draṣṭānupaśyati.

guṇebhyaśca paraṃ vetti madbhāvaṃ so.adhigacchati

guṇānetānatītya trīndehī dehasamudbhavān.

janmamṛtyujarāduḥkhairvimukto.amṛtamaśnute

arjuna uvāca.

kairliṅgaistrīnguṇānetānatīto bhavati prabho.

kimācāraḥ kathaṃ caitāṃstrīnguṇānativartate

śrībhagavānuvāca.

prakāśaṃ ca pravṛttiṃ ca mohameva ca pāṇḍava.

na dveṣṭi sampravṛttāni na nivṛttāni kāṅkṣati

udāsīnavadāsīno guṇairyo na vicālyate.

guṇā vartanta ityevaṃ yo.avatiṣṭhati neṅgate

samaduḥkhasukhaḥ svasthaḥ samaloṣṭāśmakāñcanaḥ.

tulyapriyāpriyo dhīrastulyanindātmasaṃstutiḥ

mānāpamānayostulyastulyo mitrāripakṣayoḥ.

sarvārambhaparityāgī guṇātītaḥ sa ucyate

māṃ ca yo.avyabhicāreṇa bhaktiyogena sevate.

sa guṇānsamatītyaitānbrahmabhūyāya kalpate

brahmaṇo hi pratiṣṭhāhamamṛtasyāvyayasya ca.

śāśvatasya ca dharmasya sukhasyaikāntikasya ca

śrībhagavānuvāca.

ūrdhvamūlamadhaḥśākhamaśvatthaṃ prāhuravyayam.

chandāṃsi yasya parṇāni yastaṃ veda sa vedavit

adhaścordhvaṃ prasṛtāstasya śākhā guṇapravṛddhā viṣayapravālāḥ.

adhaśca mūlānyanusantatāni karmānubandhīni manuṣyaloke

na rūpamasyeha tathopalabhyate nānto na cādirna ca sampratiṣṭhā.

aśvatthamenaṃ suvirūḍhamūlaṃ asaṅgaśastreṇa dṛḍhena chittvā

tataḥ padaṃ tatparimārgitavyaṃ yasmingatā na nivartanti bhūyaḥ.

tameva cādyaṃ puruṣaṃ prapadye.

yataḥ pravṛttiḥ prasṛtā purāṇī

nirmānamohā jitasaṅgadoṣā adhyātmanityā vinivṛttakāmāḥ.

dvandvairvimuktāḥ sukhaduḥkhasaṃjñaira- gacchantyamūḍhāḥ padamavyayaṃ tat

na tadbhāsayate sūryo na śaśāṅko na pāvakaḥ.

yadgatvā na nivartante taddhāma paramaṃ mama

mamaivāṃśo jīvaloke jīvabhūtaḥ sanātanaḥ.

manaḥṣaṣṭhānīndriyāṇi prakṛtisthāni karṣati

śarīraṃ yadavāpnoti yaccāpyutkrāmatīśvaraḥ.

gṛhitvaitāni saṃyāti vāyurgandhānivāśayāt

śrotraṃ cakṣuḥ sparśanaṃ ca rasanaṃ ghrāṇameva ca.

adhiṣṭhāya manaścāyaṃ viṣayānupasevate

utkrāmantaṃ sthitaṃ vāpi bhuñjānaṃ vā guṇānvitam.

vimūḍhā nānupaśyanti paśyanti jñānacakṣuṣaḥ

yatanto yoginaścainaṃ paśyantyātmanyavasthitam.

yatanto.apyakṛtātmāno nainaṃ paśyantyacetasaḥ

yadādityagataṃ tejo jagadbhāsayate.akhilam.

yaccandramasi yaccāgnau tattejo viddhi māmakam

gāmāviśya ca bhūtāni dhārayāmyahamojasā.

puṣṇāmi cauṣadhīḥ sarvāḥ somo bhūtvā rasātmakaḥ

ahaṃ vaiśvānaro bhūtvā prāṇināṃ dehamāśritaḥ.

prāṇāpānasamāyuktaḥ pacāmyannaṃ caturvidham

sarvasya cāhaṃ hṛdi sanniviṣṭo mattaḥ smṛtirjñānamapohanañca.

vedaiśca sarvairahameva vedyo vedāntakṛdvedavideva cāham

dvāvimau puruṣau loke kṣaraścākṣara eva ca.

kṣaraḥ sarvāṇi bhūtāni kūṭastho.akṣara ucyate

uttamaḥ puruṣastvanyaḥ paramātmetyudhāhṛtaḥ.

yo lokatrayamāviśya bibhartyavyaya īśvaraḥ

yasmātkṣaramatīto.ahamakṣarādapi cottamaḥ.

ato.asmi loke vedeca prathitaḥ puruṣottamaḥ

yo māmevamasammūḍho jānāti puruṣottamam.

sa sarvavidbhajati māṃ sarvabhāvena bhārata

iti guhyatamaṃ śāstramidamuktaṃ mayānagha.

etadbuddhvā buddhimānsyātkṛtakṛtyaśca bhārata